Dili, 17 Abril 2025 (Média Democracia) – Sekretáriu Estadu Komunikasaun Sosiál (SECOMS), asina akordu ho Radiu Komunidade 19 ne’ebé eziste territóriu laran kona-ba fundu transferénsia publika ne’ebé oferese husi Governu liuhusi SEKOMS. Atividade asina akordu ne’e realiza Salaun Maria Goreti SEI Tersa ne’e (15/04/025).
Sekretáriu Estadu Komunokasaun Sosiál, Expedito Loro Dias Ximenes hateten, Governu Da-sia konstituisionál fó apoiu ba radiu komunidade hamutuk 19 ne’ebé namkari iha Munisípiu hotu.
“Tinan ida ne’e aumenta tan radiu komunidade rua, ida iha Laklubar Manatutu, ida fali iha Balibò Bobonaro, ohin radiu komunidade Balibó asina mós ona kontratu liuhusi proposta ne’ebé radiu komunidade sira propoin mai tuir prioridade ida-idak nian ho urjénsia ida-idak.” Dehan Sekretáriu Estadu SECOMS ba jornalista sira iha Salaun Maria Goreti SEI Tersa ne’e (15/04/025)
Depois proposta hirak ne’e hato’o ba iha Sekoms hafoin ekipa Sekoms halo avaliasaun ba proposta hirak ne’ebé Radiu Komunidade sira hato’o kona-ba saida mak sei halo iha Tinan ida nia laran.
“Depois ekipa ne’e halo tiha avaliasaun haree Check no Recheck Crosscheck ho orsamentu jerál estadu nian entaun ha’u aprova, no ohin ami asina kontratu ne’ebé nia kuantidade ne’e la hanesan, tuir ida-idak nia proposta, balun 7 mill, balun 8 Mill, balun 6 mill ne’e sira mak atu jere rasik tantu ne’e transferénsia públika.” Nia dehan
Nia informa katak, kada tinan Sekretáriu Estadu Komunikasaun Sosiál apoiu ba radiu komunidade, tanba Rakom ne’e kria husi komunidade sira no servisu ba komunidadr sira.
“Tanba ne’e, ha’u husu ba jestòr no jestora sira atu sira-nia kobertura no atividade ne’e haree liubá iha atividade agrikultura sira-nian, haree liubá atividade joven nian, haree liubá atividade ne’ebé iha Munisípiu nia laran, iha postu, suku no aldeia sira-nia laran.” Nia informa
Nia salienta katak karik bele Radiu komunidade halo persentajen kobertura ne’e 60/40. 60 ba atividade agrikultór sira nian no 40 ba atividade serimoniál sira, atividade Prezidente Autoridade, Postu-Administrativu sira no Xefe Suku sira-nian, seluk ne’e halo liubá komunidade nia atividade iha Suku no Aldeia sira.
Tanba ne’e osan total ne’ebé tinan ida ne’e Sekretáriu Estadu Komunikasaun Sosiál aloka ba radiu komunidade ne’e 150 mill, fahe tuir pedidu proposta ne’ebé radiu komunidade sira hato’o mai.
Liuhusi fundu transferénsia públika ne’e bazeia ba proposta husi Radiu komunidade nian, tanba ne’e bainhira sira gasta ba sosa ekipamentu ka gasta ne’e ekipa husi Sekoms sei ba halo verifikasaun bazeia ba proposta ne’ebé hato’o karik sira la uza osan tuir proposta maka tina oin sira labele hetan ona fundu transferénsia públika refere.
Governante ne’e afirma katak, tinan oin 2026, Sekretáriu Estadu Komunikasaun Sosiál sei servisu hamutuk ho Ministériu Administrasaun Estatál hodi tau osan mós ba iha radiu komunidade sira, tanba komunidade sira eziste iha suku no aldeia, tanba ne’e iha orsamentu jerál estadu 2026 nian Ministériu Administrasaun Estatál mós iha devér atu tau-matan.
“Ida ne’e mós ha’u husu la’ós de’it ba radiu komunidade maibé husu mós ba sentru informasaun suku, tanba ita mós iha sentru informasaun suku 28 ne’ebé namkari iha Munisípiu tomak, tan ne’e ami mós husu ba Ministériu Administrasaun estatál sei tau osan ba, atu bele tau-matan ba jestaun radiu komunidade nomos jestaun ba iha sentru informasaun sira.” Nia afirma
Iha biban ne’e, Diretór Nasionál Deziminasaun Informasaun (DNDI), Manuel Alves haktuir, atividade asina akordu ho Radiu Komunidade ne’e, ho totál Radiu komunidade hamutuk 19, karik iha futuru sei aumenta tan radiu Komunidade hamutuk 21, enkuamtu ekontru kona-ba avaliasaun refere hala’o ona iha semana kotuk.
“Enkuantu kona-ba regra no ezekusaun sira ne’e informa ona ba radio komunidade sira, entaun momentu ida ne’e asina kontratu ho sira hodi entrega fundu ba radiu komunidade sira, nune’e sira bele jere tuir orientasaun ne’ebé ekipa desidi ona iha semana kotuk.” Dehan Diretór Nasionál Deziminasaun Informasaun (DNDI), Manuel Alves
Ba futuru Diresaun Nasional Dezimina Informasaun sei nafatin halo avaliasaun hamutuk ho diresaun finansas Sekoms nian hodi halo prosesu audit ki’ik ida depois fulan ida ka fulan rua sei halo prosesu hodi la’o ho ekipa diresaun no ekipa finansas husi SEKOMS.
Reportajen : Estefania
Foto : Estefania
Editor : Jp.Costa