Dili, 21 Novembru 2024 (Média Democracia) – Sentru Formasaun AROMD-TL, realiza atividade distribuisaun sertifikadu ba kandidatura traballador lian ingles aleinde programa ne’e partisipa husi SEFOPE liuhusi Diresaun Nasional Empregu no Estranjeiru, atividade ne’e realiza iha salaun igreja Sacrojes Dili, Kuarta semana ne’e
Tuir Diretor Diresaun Nasional Empregu no Estranjeiru (DNEE) João Correia Pereira hateten, liuhusi formasaun ne’ebé Sentru Formasaun AROMD-TL fó ba kandidatura traballador tenke aproveita dia-di’ak oportunidade ida ne’e bainhira hetan ona sertifikadu sei rona informasaun husi SEFOPE atu ba aprezenta iha munisípiu durante hala’o teste eskrita.
“Ha’u husu ba kandidatura sira tenke aproveita dia-di’ak oportunidade ida ne’e tanba liuhusi sentru formasaun ne’ebé durante fasilita ona hodi aumenta imi nia koñesimentu ba lian ingles hodi hetan sertifikadu, nune’e bele ba aprezenta iha SEFOPE Munisípiu nian bele update koñesimentu lian ingles durante ne’e imi aprende garante bele tama iha sistema hodi ba servisu iha Australia.” Dehan Diretor Diresaun Nasional Empregu no Estranjeiru (DNEE) João Correia Pereira
Diretor hatutan, iha sentru formasaun ida ne’e mós laos lian Ingle de’it maibé iha mós lian Korea no Japaun nune’e fasil tebes ba estudante sira bele mai aprende hodi aumenta koñesimentu ne’ebé di’ak hodi kompete ba servisu iha rai liur
Iha fatin hanesan Prezidente Assosiasaun Ramelau Oan Moris Domin Iha Timor-Leste AROMD-TL, Luis Ximenes Soares hateten, sentru formasaun ida ne’e harii iha 2019 hetan legalizasaun husi Ministeriu Justisa no sai membru Organizasaun Fongtil
“Ita-nia objetivu distribui sertifikadu ba kandidatu sira ne’e foin daudaun tuir teste eskrita la pasa ho valor verry por, por no sufisiente, ami fó formasaun ba sira durante fulan tolu nia laran ho lian ingles.” Dehan Prezidente Assosiasaun Ramelau Oan Moris Domin Iha Timor-Leste AROMD-TL, Luis Ximenes Soares
Nia hatutan ohin ekipa sefope nian ne’ebé partisipa iha seremonia ida ne’e sai hanesan sasin ida iha koñesimentu ba sentru formasaun refere, tanba iha fulan kotuk husi Diresaun Nasional Empregu no Estranjeiru mak fó abertura ba kursu refere.
“Ita-nia distribui sertifikadu ne’e ba formandu sira hamutuk 209 ne’e kompostu husi lian Korea no Japaun, maibé formandu lian ingles hamutuk 192 nune’e sira ida-idak sei fila ba munisípiu hodi hasoru Sefope bele tuir teste hodi aumenta valor, nune’e bele tama iha sistema hodi hein oportunida mai bele ba servisu iha Australia.” Dehan Prezidente AROMD-TL
Nia salienta husi lideransa AROMD-TL nia servisu atu kontrola formandu sira-nia kontribuisaun hanoin ideia tenke hatudu atetude ne’ebé di’ak iha ambiente ne’ebé durante ne’e sira aprende
“Ha’u nia observasaun katak formandu ne’ebé duarante ne’e aprende no tuir formasaun iha sentru Assosiasaun Ramelau Oan Moris Domin Iha Timor-Leste AROMD-TL ida ne’e sempre hatudu sira-nia atetude ne’ebé iha disiplina.” Prezidente hatutan
Prezidente esplika kle’an liutá katak sentru Assosiasaun Ramelau Oan Moris Domin Iha Timor-Leste AROMD-TL daudaun ne’e sei simu nafatin estudante foun ne’ebé hakarak aprende lian Korea, Japaun no Lian Ingles, nune’e bele hetan oportunidade hodi ba servisu iha rai liur. Aleinde ne’e sentru refere durante ne’e produz ona formandu hamutuk 10 mill oital iha lian ingles.
Reportajen : Nelfiano
Foto : Nelfiano