Dili, 10 Abril 2025 (Média Democracia) – AIFAESA hakarak klarifika kona-ba servisu inspesaun no fiskalizasaun bazeia ba lei nú.26/2016 ne’ebé hetan primeira alterasaun nú.29/2024, servisu AIFAESA hanesan servisu opersionál ne’ebé tun direira iha terrenu haree husi parte tolu hanesan Komérsiu, Indústria no Turismu.
Iha oportunidade ne’e AIFAESA hakarak anúnsia ba públiku relasiona ho empreza SEARA ne’ebé nia ezisténsia la’ós iha kapitál Dili de’it maibé iha mós Munisípiu sira.
“Tan ne’e bainhira ekipa identifika fatin estabelesimentu, katak fatin komersializasaun ne’ebé SEARA loke hanesan iha Pantai-Kelapa ne’e ekipa fó sansaun de’it ba fatin komersializasaun, la’ós ba fatin estabelesimemtu sira seluk ne’ebé SEARA loke ba ne’e, se iha fatin SEARA seluk mak hetan mós iregularidade nafatin katak AIFAESA sei halo nia papel.”Dehan Inspetora Jerál, Odete Viegas ba Jornalista sira iha salaun enkontru AIFAESA kuarta ne’e (09/04)
Relasiona ho empreza SEARA ne’ebé ekipa AIFAESA identifika hodi taka permanente fatin estabelesimentu, tanba iha tinan kotuk 2024 Ekipa detekta operadór ekonómiku refere fa’an produtu espiradu, estragus no ganhafikadu.
“Rekijitus balun nia la kumpre no nia halo ida ne’e desde 2022, ita bolu reinsidensia entaun iha momentu ida ne’e fó mós nia hijiene ne’ebé ladun diak, AIFAESA halo enseramentu temporariu ne’e laos ba SEARA deit maibé loja barak mós ami halo.” Dehan Inspetora AIFAESA Odete Viegas
Nia esplika, momentu ne’ebá AIFAESA fó prazu fulan ida ba loja SEARA no sira konsege halo tuir no kumpri rekejitu 22 ne’ebé ekipa fó sansaun durante semana tolu (3).
“Entaun ita halo fali reinspeksaun ba dalarua husi AIFAESA no nia kumpri ona rekejitu sira ne’e mak ita reativa fali maibé iha momentu ne’ebá operador ekonomiku ne’e nia nain mós konkorda atu asina Karta Aseitasaun katak se ita-boot halo tan erro hirak ne’e mak sei taka permanente.” Nia esplika
Inspetora ne’e afirma katak, infelismente operadór ekonómiku ne’e repete nafatin hahalok hirak ne’e.
“Entaun ita foti desizaun katak taka permanente no nia sei la halo tan komersializasaun iha fatin ida Pantai-Kelapa ne’e, maibé Seara seluk ita la taka tanba sira nia fatin estabelesimentu ne’e moos.” Nia informa
Tanba bazeia ba lei ne’ebé AIFAESA iha hateten katak tuir prosedimentu la’os halo inspesaun hodi taka de’it, maibé sei tuir prosesu balu hodi reativa fila-fali bainhira kumpri tuir saída mak ekipa husi AIFAESA haruka.
Nia haktuir tan, servisu ne’ebé AIFAESA halo ne’e iha risku nia laran, maibé funsionáriu hotu iha instituisaun AIFAESA iha komitmentu duni hakarak servi ba rai ida ne’e no servi ba povu Timor-Leste.
“Tanba ne’e mak ita-boot sira kestiona ne’e normal maibé labele kritika atu hamonu, ha’u husu ba publiku atu bele hatene papel AIFAESA nian, nune’e bele entende no tenki kopera para AIFAESA bele halo ninia kna’ar ne di’ak liután.”Nia haktuir
Nia informa katak iha loron kuarta ne’e (08/04) produtu ne’ebé hasai husi loja refere ho kamioneta rua, ho sasán nia item hamutuk 55 ne’ebé konsidera barak loos no la’os oitoan de’it.
Entretantu sasan hirak ne’e rekolla ona no dadaun ne’e tau hela iha edifísiu AIFAESA, tuir planu iha loron sesta mak foin lori ba halo destroisaun iha tibar.
Reportajen : Estefania
Foto : Estefania