Dili, 25 Outobru 2024 (Média Democracia) – Sekretária Estadu Igualdade nia funsionáriu realiza atividade doasaun raan hodi oferese ba Hospital Nasionál Guido Valadares ne’ebé hala’o husi departamentu Banku de Sangue.
Atu selebra loron nasionál feto, SEI nia funsionáriu sira realiza atividade doasaun raan katak “Ran Turuk Ida Bele Salva Feto nia Vida”
“loron ohin Sekretária Estadu ba Igualdade servisu hamutuk ho Ministériu Saúde liliu iha diresaun Banku de Sangue nian hodi hala’o atividade doasaun raan nian nomos apoiu kooperasaun fatin husi Timor Plaza.” Dehan Diretór Jerál SEI
Atividade sira ne’e hala’o hodi komemora loron nasionál feto Timor-Leste ba dala 48 ne’ebé monu iha loron 3 fulan Novembru, kada tinan ho tema “feto iha prosesu dezenvolvimentu Nasionál depois tinan 25 konsulta popular.
Nia dehan hola parte iha atividade ne’e SEI halo konvite ba parseiru sira hotu.
“Ita hasai ita-nia konvite ba parseiru sira hotu husi SEI nian hanesan Liña Ministériu sira, PNTL no seluk tan nomós ba parseiru sosiedade sivil ne’ebé durante ne’e servisu ba asuntu Igualdade Inkluzaun nian, entaun atividade sira ne’e sei la’o to’o lokraik, nakloke ba ema hotu atu ida-idak jere nia tempu hodi bele mai kontribui sira-nia raan.” Nia dehan
Nia esplika halo doasaun raan iha Timor Plaza ne’e ho objetivu públiku ne’ebé vizita fatin refere iha oportunidade atu oferese tan.
“Ita halo iha fatin ida ne’e ho objetivu ida sira ne’ebé la tama iha konvite maibé karik ema ruma mai Timor Plaza mak sira hakarak mai halo doasaun raan iha mós oportunidade ba sira atu mai.” Nia dehan
Enkuantu Selebrasaun Loron Nasionál Feto ne’e sei realiza iha Quelicai iha loron 6 fulan Novembru tinan ida ne’e hamutuk ho komunidade sira.
Iha fatin hanesan Xefe Departamentu Banku de Sangue, Aleixandre Mendonça atividade doasaun raan ne’e, realiza husi SEI hodi komemora loron Nasionál feto ninian. agradese ba funsionáriu SEI ne’ebé ho laran luak apoiu raan ba HNGV.
“Entaun sira mai halo atividade doasaun raan la’os foin primeira-vés. Maibé kada tinan sira sempre halo doasaun raan hodi tulun ita-nia maluk pasiente sira. Ne’ebé daudauk ne’e presiza hela tulun liuhusi raan.” Nia hateten.
Nia esplika, kona-ba na’in hira ne’ebé atu oferese raan ba sira ohin loron ne’e seidauk hatene ne’e prepara husi SEI. Tanba sira maka realiza atividade ne’e, depois maka haree dadus na’in hira maka oferese ona raan.
Entretantu Doadór, Nuno Celestino Soares reforsa tan katak ligadu ho tema ohin ne’e dehan ho raan turuk ida bele salva ema nia vida. Tanba ne’e maka nia konsiénsia tomak hakarak halo doasaun raan duni.
“Ha’u ho konsiénsia rasik maka ohin halo doasaun raan hodi oferese ba BdS. Nune’e rai karik ita ninia maluk sira balun presiza raan sira atende ho oferese lais.” Nia tenik.
Nia deklara liután katak nia sente kontente tanba oferese raan ba ema. Karik ba futuru bele salva maluk sira ne’ebé sei presiza tulun liuhusi raan.
Reportajen : Estefania
Foto : Estefania