Dili 24 Setembru 2024 (Media Democracia) – United Nations Population Fund (UNFPA) servisu hamutuk ho Secretária de Estado da Igualdade (SEI) realiza seminariu durante loron tolu ho nia tema “Ha Ambiente Sistema Jestaun Kazu Violensia Bazeia Jeneru (VBJ) Iha Timor Leste. Seminariu ne’e relaiza iha salaun Delta Nova
Iha diskursu husi UNFPA Domingas Bernardo Adjunta Reprezentante UNFPA iha Timor-Leste hateten kontente tebes bele mai partisipa iha sessaun abertura semináriu loron tolu (3) nian, Semináriu ida ne’e hanesan seguimentu (follow-up) ida husi delegasaun bo’ot timorense nian ba Portugal tinan kotuk kona-ba hametin sistema jestaun de-kazu violénsia bazeia ba jéneru (VBJ) hodi assegura resposta multisetoral ne’ebé efetiva no koordenada ba vítima ka sobrevivente kazu VBJ.
“Ita hotu hatene katak Violênsia Bazeia Ba Jêneru (VBJ) sai ona hanesan assuntu ka problema saúde públika no violasaun ba direitus umanus iha nasaun joven, Timor-Leste. Prevalensia violênsia kontra feto no labarik feto sira, tuir Peskiza Demográfika no Saúde Timor-Leste tinan 2016 nian, hatudu katak un-tersu (%38) husi feto sira ho idade tinan 15-49 sofre ona violénsia fíziku/seksuál husi kedas sira sei tinan 15. No, tuir Estudu Nabilan nian iha tina 2015, hatudu katak (%59) husi feto sira ho idade tinan 15-49 sofre ona violénsia fízika/seksuál husi kedas sira sei tinan 15. Ida ne’e kazu ida ke sériu no presiza ita hotu nia atensaun no serbisu hamutuk no makas hodi responde ba assuntu ida ne’e.” Dehan Domingas Bernardo Adjunta Reprezentante UNFPA iha Timor-Leste
Nia hatutan Atu responde no rezolve assuntu ida ne’e, Timor-Leste halo ona progressu barak liu husi promulgasaun Lei Kontra Violénsia Domestíka iha tinan 2010, no dezenvolve ka implementa ona Planu Asaun Nasional kona-ba Violénsia Bazeia ba Jéneru (PAN-VBJ) iha tinan 2012-2016, 2017-2021 no agora ita iha hela prosesu implementasaun PAN-VBJ 2022-2032. PAN-VBJ 2022-2032 tinan ida ne’e, Ministério da Solidariedade Social e Inklusaun (MSSI) mós aprova ona Padraun Prosedimentu Operasionál (PPO) kona-ba Jestaun no Koordenasaun Hodi Suporta Vítima Violénsia Bazeia ba Jéneru. Dezenvolvimentu ba SOP primeiru apoia husi UNFPA no revizaun ba SOP refere ne’ebé foin dadauk hetan aprovasaun apoia husi Asia Foundation.
“Objetivu prinsipal husi semináriu ida ne’e mak atu fornese partisipante sira ho koñesimentu no abilidade nesessáriu sira hodi hametin liután koodenasaun entre rede referal VBJ nian, nomos halo advokasia, dezeña no monitoriza servisus jestaun kazu ba VBJ tuir padraun kualidade internasional, hanesan fundamentu importante ida atu dezenvolve pontu fokal VBJ no fornesedor servisus VBJ sira nia kompeténsias téknikas. Semináriu ida ne’e mós sei kontribui ba finalizasaun esbosu relatóriu ida kona-ba pontu situasaun (situation analysis) ba reforsa sistema jestaun kazu VBJ iha Timor-Leste, ne’ebe sei inklui mós roadmap no rekomendasaun planu asaun sira hodi ita bele kontinua reforsa sistema jestaun kazu ba VBJ iha Timor-Leste iha nivél nasionál no munisípiu.” Esklarese Adjunta Reprezentante UNFPA iha Timor-Leste
Hatutan husi SEI Diretora Nacional Política Igualdade Gênero, Celeste Ramos Martins Gonçalves, kazu ida sériu no presiza ita hotu nia atensaun no serbisu hamutuk no makas hodi responde ba assuntu ida ne’e. Atu responde no rezolve assuntu ida ne’e, Timor-Leste halo ona progressu ne’ebé signifikante liuhusi Lei.
“Promulgasaun Lei Kontra Violénsia Domestíka iha tinan 2010. Dezenvolve no implementa ona Planu Asaun Nasional kona-ba Violénsia Bazeia ba Jéneru (PAN-VBJ) iha tinan 2012-2016, 2017-2021 and agora ita iha hela prosesu implementasaun PAN-VBJ 2022-2032. PAN-VBJ 2022-2032 iha pillar tolu (3) importante hanesan, Prevensaun Violénsia Kontra Feto no Labarik feto, Provizaun Servisus Essensial ba Feto no labarik Feto ne’ebé Esperiensia Violénsia, no Apoiu Legal no Justisa.” Dehan Diretora Nacional Política Igualdade Gênero, Celeste Ramos Martins Gonçalves
Tinan ida ne’e, Ministério da Solidariedade Social e Inclusão (MSSI) mos aprova ona Padraun Prosedimentu Operasionál (PPo) kona-ba Jestaun no Koordenasaun Hodi Suporta Vítima Violénsia Bazeia ba Jéneru. Purtantu, semináriu ida ne’e essesial tebes atu koalia kona-ba implementasaun pillar rua (2) husi NAP-VBJ ligadu ba reforsa provizaun servisus essensial sira no importante liu atu reforsa ambiente sistema jestaun kazu VBJ. Entretantu Seminariu ne’e partisipa husi delegasaun ne’ebé kompostu husi reprezentante husi SEI, MSSI, Polisia VPU, NGO lokal (FOKUPERS) no UNFPA.
Reportajen : Domingas
Foto : Domingas