Dili, 25 Outobru 2024 (Média Democracia) – Universidade Nasional Timor Lorosa’e UNTL servisu hamutuk ho Universitas Mercu Buana Jakarta asina MoU hodi hare’e ba servisu entre Universidade nain rua ne’e iha futuru, atividade ne’e realiza iha salaun Konferensia UNTL Central Dili.
Iha entrevista ho Pro-reitor ba asuntu kooperasaun prof Tome Xavier Jeronimo hateten, atividade ohin ne’e asina MoU entre Universidade nain rua ne’e atu servisu hamutuk iha parte edukasaun nian iha futuru.
“Programa husi Universitas Mercu Buana ne’e barak tebes ita haree sira-nia esplikasaun no video kona-ba universitas ne’e kapas tebes, UNTL deste ita asina MoU ne’e ninia prosesu teknika ba oin ne’e depende ona ba iha Universidade no fakuldades sira ne’ebe iha ona ligasaun ho area sira ne’ebé espesifiku, entaun ita prontu atu servisu hamutuk hein de’it fakuldade no dekanu sira asina ho universitas UMB ita bele lao ona.” Dehan Pro-reitor ba asuntu kooperasaun prof Tome Xavier Jeronimo
Nia hatutan ohin iha video ne’ebé asiste iha area espesifiku no iha area sira hanesan ekonomia, komputador sira nomos area seluk ne’ebé mesak kapas de’it tan ne’e ohin iha mós pergunta ne’ebé fó ba universitas Mercu Buana sira bele simu estudante sira husi nasaun seluk ka Lae entaun sira hatan simu nomos fatin prepara ba estudante sira ne’ebé mai husi nasaun la hanesan.
Iha sorin seluk reprezentante Head Of International Cooperation universitas Mercu Buana Jakarta Anggi Rapsanjani hateten, haksolok tebes lori universitas Mercu Buana Jakarta nia naran agradese ba iha oportunidade ida ne’e hodi bele mai koalia ho Universidade Nasional Timor Lorosa’e UNTL atu bele servisu hamutuk ho UMB Jakarta iha futuru.
“Agradese ba kolaborasaun husi UNTL ne’ebé hakarak ona servisu hamutuk ho UMB Jakarta espera katak servisu hamutuk ida ne’e bele lori resultadu ne’ebé diak ba iha Universidade rua ne’e iha futuru nomos bele tulun estudante sira ne’ebé hakarak kontinua sira Nia estudu.” reprezentante Head Of International Cooperation universitas Mercu Buana Jakarta Anggi Rapsanjani
Entretantu Kooperasaun ne’ebé hala’o husi universidade Nasional Timor Lorosa’e (UNTL) ho universidade Mercu Buana Jakarta (UMB) haree liubá iha area Tolu (3), hanesan Komunikasaun Sosial, Ekonomia no Engenaria.
Reportajen : Domingas
Foto : Domingas