Dili, 14 Abril 2025 (Média Democracia) – Autoridade Protesaun Sivíl liuhusi Gabinete Relasaun Externa no Komunikasaun GREK hala’o komunikadu imprensa relata dadus dezastre naturais durante semana ida no registu vitima afetadu ba dezastre hamutuk ruanulu resin-hitu no vitima ida mate hafoin akontese dezastre iha RAEOA, komunikadu imprensa ne’e hala’o iha salaun APC Kaikoli Dili.
Tuir Xefe Gabinete Relasaun Externa no Komunikasaun (GREK), Nelson Nunes Orleans hateten, hahu loron hitu fulan abril to’o loron sanulu resin-haat fulan abril tinan 2025 durante semana ida nia laran servisu ne’ebé Autoridade Protesaun Sivíl hala’o iha Munisipiu sira hodi rekolla ka rejista kazu dezastre naturais hanesan rai halai afeta uma rua, ahi-han uma ida, anin sobu uma rua, apoiu emerjensia rua, ema afetadu hamutuk ruanulu resin-hitu no ema evakua hamutuk sanulu resin-neen, no priense kriteria hamutuk tolu.
“Munisipiu sira ne’ebé hetan afetadu husi dezastre naturais hanesan Munisipiu Covalima rai hala’i estraga uma-rua, Munisipiu Lautem ahi-han uma ida, Munisipiu Likisa anin sobu uma ida, RAEOA ema mate ida, Munisipiu Viqueque anin sobu uma ida.” Lia-hirak ne’e hato’o husi porta-voz Xefe Gabinete Relasaun Externa no Komunikasaun (GREK), Nelson Nunes Orleans
Nia hatutan durante akontesementu ne’e Autoridade Protesaun Sivíl hala’o kedas apoiu emerjensia ba iha vitima afetadu ba iha dezastre naturais no halo mós evakuasaun ba iha ema sira ne’ebé hetan dezastre naturais, Autoridade Protesaun Sivíl mós halo rejistrasaun ba iha uma sira ne’ebé hetan afetadu husi dezastre ne’e no oferese pakote emerjensia ba vitima sira kada Munisipiu, tanba membru Autoridade Protesaun Sivíl sira iha Munisipiu ida-idak hala’o ninia servisu bainhira akontese dezastre sira prontu atu apoiu emerjensia ba vitima.
“Daudaun ne’e Autoridade Protesaun Sivíl sira ne’ebé iha Munisipiu sira foti ona dadus hodi bele fó apoiu emerjensia ba iha vitima sira, ba sira ne’ebé uma hetan estragus total Autoridade Protesaun Sivíl sei lori dadus mai hatama iha ne’e bele hetan apoiu ba iha material hodi bele halo fali sira nia uma, ba iha vitima sira ne’ebé afetadu ba dezastre naturais hanesan ahi-han uma nomos anin sobu uma agora daudaun Autoridade Protesaun Sivíl apoiu ona pakote emerjensia no balun sei hela iha viziñu nia uma, no tempu badak sei resolve vitima sira nia uma.” Dehan Xefe Gabinete Relasaun Externa no Komunikasaun (GREK)
Nia informa pakote emerjensia ne’ebé Autoridade Protesaun Sivíl ajuda ba iha vitima sira mak hanesan material nomos nonmaterial signifika, iha material balun ne’ebé vitima sira bele uza no balun sira hahan, pakote emerjensia ne’ebé oferese husi Autoridade Protesaun Sivíl ba iha hahan ne’e durante loron tolu nian laran ba iha vitima afetadu sira. Nafatin husu ba komunidade sira atu tau atensaun ba iha oan sira nomos hadok-an husi fatin risku bainhira anin boot ka udan.
Reportajen : Domingas
Foto : Domingas