Dili, 23 Outobru 2024 (Média Democracia) – Relasiona ho komemorasaun Loron Nasionál Feto ne’ebé sei akontese iha loron 3 fulan Novembru 2024, nune’e prezidente Asosiasaun Jornalista Timor-Leste hato’o parabens ba feto Timor-Leste hotu ne’ebé luta ba direitu umanus, Igualdade Jéneru, injustisa no liliu ba feto vulneravel sira nia lian.
Prezidente Asosiasaun Jornalista Timor-Leste Zevonia Maria Vieira hateten, feto hanesan xave ba dezenvolvimentu no partisipa iha seitór hotu hodi promove igualdade jéneru no inkluzaun.
“Feto hanesan xave ida ba dezenvolvimentu, sein feto ninia kontribuisaun dezenvolvimentu mós la balansu bainhira presrespetiva feto nian la involve iha ideia ka hanoin sira ne’ebé kontribui ba estadu nian, feto nia partisipasaun iha iha seitór hotu-hotu tantu iha média, Jornalista feto sira nia servisu kna’ar ne’ebé sira halo hodi hato’o povu nia lian ne’e importante loos ho nune’e hanesan parte ida hodi promove Igualdade Jéneru nomos kontra deskriminasaun ba feto maluk sira, ba feto defisiénsia sira nomos grupu vulneravel sira seluk ne’ebé sente marjinál liu.” Hateten Prezidente AJTL iha Fundasaun Haburas Kuartu-feira ne’e.
Nune’e nia esperansa ho komemorasaun loron nasionál Feto bele aumenta númeru kualidade hodi haforsa rede ba iha luta injustisa.
“Entaun ho komemorasaun loron nasionál feto Espera katak feto iha forsa liu, aumenta feto nia númeru kualidade atu bele haforsa rede ba iha luta injistisa no luta ba direitu umanus ne’ebé durante ne’e ita luta hamutuk, tanba direitu umanus sai hanesan parte fundamentál ba ema hotu- hotu hodi luta kontra desigualdade ne’ebé sei akontese.” Nia esperansa
Tanba durante ne’e feto sai nu’udar objetu liliu ba informasaun sira iha média sosiál hodi la valoriza kontribuisaun feto nian.
“Dalabarak ita haree feto sai subjetu ba iha informasaun ne’ebé ita asesu iha sosial média, liliu iha era dijital feto sempre sai fatin ba ema seluk hodi diskrimina no la valoriza kontribuisaun feto nian, ita hatene tempu naruk nia laran veterana sira, heroina sira kontribui sira ninia-an sein atu hetan Lukru (balasan) ne’ebé sira hakarak, sira kontribui tanba sira sente katak ne’e parte husi responsabilidade ne’ebé sira fó.” Nia dehan
Ho komemorasaun loron nasionál feto ne’e fó hanoin atu refleta fila-fali luta na’in feto sira no heroina nian durante tempu naruk nia laran.
“Entaun loron nasionál ne’e oinsá mak ita refleta hodi sai hanesan reflesaun ida ba ita, liliu joven feto sira atu banati tuir valor ne’ebé sira kuda ona iha tempu naruk nia laran no rezulta ohin loron joven sira goja moris, partisipa iha prosesu dezenvolvimentu iha aspeitu oioin ne’ebé joven feto sira fó.” Nia haktuir
Prezidente AJTL ne’e hateten Estadu no Governu presiza valoriza ba joven feto sira nia kontribuisaun no kreatividade sira.
“Ha’u hakarak fokus ba joven feto tanba ohin loron númeru joven aumenta iha Timor-Leste, sira-nia kontribuisaun, sira-nia kreatividade ne’ebé sira halo ne’e presiza duni merese atu hetan konsiderasaun husi estdu, konsidera husi governu atu bele valoriza sira-nia kontribuisaun maske sira kontribui ho voluntáriu maibé valor boot ba sira.” Hatene prezidente AJTL
Nia husu ba mane sira atu respeita papel feto hodi kontribui ba kontra Violénsia Bazeia ba jéneru no abuju seksuál.
“Entaun ho ida ne’e oinsá mak mane sira mós respeita papel feto nian hodi kontribui ba kontra Violénsia Bazeia ba Jéneru, Violénsia Doméstika liliu abuju Seksuál ne’ebé dalabarak akontese ba feto sira iha era dijital liliu sosiál média ne’ebé dalabarak feto sempre hasoru insultu ka trata no hatudu Asaun negativu ba feto sira.” Nia salienta
Tanba ne’e iuhusi asaun no komitmentu mak kontinua luta nomos fiar an hodi kontribui, nune’e hatudu rezultadu ne’ebé di’ak, la’ós ba ita-nia an de’it maibé ba povu nomos ba estadu Timor-Leste ne’ebé demokrátiku iha Konstitusaun hodi garante Promove Igualdade Jéneru ne’ebé inkluzivu no justu.
Reportajen : Estefania
Foto : Estefania